პროსნიქს D #30კაფს

პროსნიქსი D

შემადგენლობა

აქტიური ინგრედიენტები: დუტასტერიდი და ტამსულოზინის ჰიდროქლორიდი.
ჟელატინის  თითოეული  მყარი კაფსულა შეიცავს 0.5 მგ დუტასტერიდს და 0.4 მგ ტამსულოზინის ჰიდროქლორიდს.

სხვა ინგრედიენტები: მანიტოლი, მიკროკრისტალური ცელულოზა,  ჰიდროქსიპროპილმეთილცელულოზა, პოვიდონი, ჰიდროგენიზებული აბუსალათინის ზეთი, კოლოიდური სილიციუმის დიოქსიდი, მაგნიუმის სტეარატი, protectab HP, რკინის წითელი ოქსიდი, ლაქტოზა, სიმინდის სახამებელი და ნატრიუმი კროსკარმელოზა.

გამოყენება

პროსნიქსი D გამოიყენება მამაკაცებში პროსტატის ჯირკვლის კეთილთვისებიანი ჰიპერპლაზიის სამკურნალოდ, რაც გამოწვეულია ჰორმონის დიჰიდროტესტოსტერონის ჭარბი პროდუქციით.

პროსნიქსი D შეიცავს ორ აქტიურ ნივთიერებას: დუტასტერიდს და ტამსულოზინს. დუტასტერიდი – მიეკუთვნება 5 ალფა რედუქტაზას ინჰიბიტორების ჯგუფს.

ტამსულოზინი – მიეკუთვნება ალფა-ადრენობლოკატორების  ჯგუფს.

პროსტატის გადიდებისას შეიძლება თავი იჩინოს შარდვის პრობლემებმა, როგორიცაა შარდის გამოყოფის გაძნელება და საპირფარეშოში ხშირად შესვლის საჭიროება. ამან შეიძლება გამოიწვიოს შარდის ნაკადის შემცირება. მკურნალობის გარეშე არსებობს რისკი, რომ შარდის მოძრაობა მთლიანად დაიბლოკოს (შარდის მწვავე შეკავება), რაც დაუყოვნებელ სამედიცინო მკურნალობას საჭიროებს. ზოგიერთ შემთხვევაში აუცილებელი ხდება ქირურგიული ჩარევა, რათა მოხდეს პროსტატის ჯირკვლის მოცილება ან დაპატარავება.

დუტასტერიდი ამცირებს ჰორმონის დიჰიდროტესტოსტერონის გამომუშავებას, რაც ხელს უწყობს პროსტატის დაპატარავებას და სიმპტომების შემსუბუქებას. ამის შედეგია შარდის მწვავე შეკავების რისკისა და ოპერაციის საჭიროების შემცირება.

ტამსულოზინი იწვევს პროსტატის ჯირკვლის კუნთების მოდუნებას, ამარტივებს შარდის გამოყოფას და სწრაფად აუმჯობესებს სიმპტომებს.

უკუჩვენებები

პროსნიქსი D არ გამოიყენება:

–         ქალებში (მედიკამენტი განკუთვნილია მხოლოდ მამაკაცებისათვის);

–         ბავშვებში ან 18 წლამდე მოზარდებში;

–         დუტასტერიდის ან 5 ალფა რედუქტაზას სხვა ინჰიბიტორის, ტამსულოზინის, სოიოს, არაქისის ან მედიკამენტის რომელიმე სხვა ინგრედიენტის (ჩამოთვლილია შემადგენლობაში) მიმართ ალერგიულ პირებში;

–         დაბალი წნევისას, რომლის დროსაც აღსანიშნავია თავბრუსხვევა, მხედველობის დაბინდვა ან გულის წასვლა (ორთოსტატიკური ჰიპოტენზია);

–         ღვიძლის მძიმე დაავადების არსებობისას.

რომელიმე ზემოთ დასახელებული მდგომარეობისას, ამ მედიკამენტის მიღებამდე საჭიროა  ექიმთან კონსულტაცია.

გაფრთხილებები და სიფრთხილის ზომები

პროსნიქსი D-ს მიღებამდე საჭიროა ექიმთან დამატებითი კონსულტაცია ქვემოთ ჩამოთვლილი გარემოებების გათვალისწინებით.

–         ზოგიერთ კლინიკურ კვლევაში, უფრო მეტ პაციენტს, ვინც ღებულობდა დუტასტერიდს და ალფა ბლოკერს, ტამსულოზინის მსგავსად, ჰქონდა გულის უკმარისობა, ვიდრე პაციენტებს, რომლებიც იღებდნენ მხოლოდ დუტასტერიდს ან მხოლოდ ალფა ბლოკატორს.

–         ღვიძლთან დაკავშირებული პრობლემების თუნდაც ოდესმე არსებობისას, პროსნიქსი D-ის მიღებამდე საჭიროა დამატებითი გამოკვლევები.

–         თირკმლის მწვავე პრობლემების არსებობისას, ამის საჭიროა ექიმის ინფორმირება;

–         კატარაქტის ოპერაცია. კატარაქტის ოპერაციის ჩატარების გადაწყვეტილებისას,  ექიმმა შესაძლოა მოითხოვოს პროსნიქსი D-ს მიღების მთლიანად შეწყვეტა  ოპერაციამდე. ოპერაციამდე აცნობეთ თვალის სპეციალისტს პროსნიქსი D-ს ან ტამსულოზინის (ან მანამდე მკურნალობის) შესახებ. სპეციალისტს დასჭირდება უსაფრთხოების ზომების მიღება იმისათვის, რათა თავიდან აიცილოს ოპერაციის დროს შესაძლო გართულებები.

–         სიფრთხილეა საჭირო, რათა პროსნიქსი D-ს კაფსულის შიგთავსი არ მოხვდეს ქალის, ბავშვის  და მოზარდის კანზე, რადგან შესაძლებელია აქტიური ნივთიერებების კანის საშუალებით შეწოვა ორგანიზმის მიერ. ამ ნივთიერებების კანთან რაიმე კონტაქტის შემთხვევაში დასვრილი ადგილი დაუყოვნებლივ უნდა იქნას დაბანილი საპნით და წლით.

–         სქესობრივი კავშირის დროს რეკომენდებულია პრეზერვატივის გამოყენება. დუტასტერიდი ნაპოვნია მამაკაცთა სპერმაში, რომლებიც იღებდენ პროსნიქსი D-ს. შესაბამისად, თავიდან უნდა იქნას აცილებული პარტნიორის ორგანიზმში სპერმის მოხვედრა, რადგან დუტასტერიდმა შეიძლება გავლენა მოახდინოს მამრობითი სქესის ბავშვის ნორმალურ განვითარებაზე. ნაჩვენებია, რომ დუტასტერიდი ამცირებს სპერმის რაოდენობას, სპერმის მოცულობას და სპერმის მოძრაობას.

–         პროსნიქსი D გავლენას ახდენს  PSA-ის (პროსტატის სპეციფიკურo ანტიგენი) ტესტის შედეგზე, რომელიც ზოგჯერ გამოიყენება პროსტატის კიბოს დასადგენად. PSA-ის ანალიზის საჭიროებისას, აცნობეთ ექიმს თუ იღებთ პროქსინქსი D-ს. პროსნიქსი D-თი მკურნალობისას საჭიროა PSA რეგულარული კონტროლი.

–         პროსტატის კიბოს მომატებული რისკის მქონე პირთა კლინიკურ კვლევაში, მამაკაცებს, რომლებიც იღებდნენ დუტასტერიდს, ჰქონდათ პროსტატის კიბოს სერიოზული ფორმა უფრო ხშირად, ვიდრე მამაკაცებს, რომლებიც არ იღებდნენ დუტასტერიდს. დუტასტერიდის გავლენა პროსტატის კიბოს ამ სერიოზულ ფორმაზე გამოვლენილი არ არის.   

–         პროსნიქსი D-მ შეიძლება გამოიწვიოს მკერდის გადიდება და მტკივნეულობა. თუ ამას პრობლემური სახე აქვს ან შეინიშნება მკერდის შეშუპება ან მკერდიდან გამონადენი, აუცილებელია აცნობოთ ექიმს ამ ცვლილებების შესახებ, რადგან ეს შეიძლება იყოს სერიოზული მდგომარეობის,  მაგალითად, მკერდის კიბოს ნიშნები.

პროსნიქსი D-ს მიღებასთან დაკავშირებით შეკითხვის არსებობის შემთხვევაში, დაუკავშირდით ექიმს ან ფარმაცევტს.

პროსნიქსი D და სხვა მედიკამენტები

აცნობეთ ექიმს ან ფარმაცევტს თუ იღებთ, უახლოეს პერიოდში მიიღეთ ან შესაძლოა მიიღოთ სხვა ნებისმიერი მედიკამენტი. პროსნიქსი D არ მიიღოთ ისეთ მედიკამენტებთან ერთად, როგორიცაა

–         სხვა ალფა ბლოკატორები (პროსტატის ჰიპერპლაზიის ან  არტერიული ჰიპერტენზიისთვის);

–         კეტოკონაზოლი (გამოიყენება სოკოვანი ინფექციების სამკურნალოდ).

შესაძლებელია პროსნიქსი D-თან ზოგიერთი მედიკამენტის  ურთიერთქმედება და სავარაუდო გვერდითი მოვლენების გამოვლენა. ეს მედიკამენტებია:

–         PDE5 ინჰიბიტორები, როგორიცაა ვარდენაფილი, სილდენაფილის ციტრატი და ტადალაფილი;

–         ვერაპამილი ან დილთიაზემი;

–         რიტონავირი ან ინდინავირი;

–         იტრაკონაზოლი ან კეტოკონაზოლი;

–         ნეფაზოდონი;

–         ციმეტიდინი;

–         ვარფარინი;

–         ერითრომიცინი;

–         პაროქსეტინი;

–         ტერბინაფინი;

–         დიკლოფენაკი.

აცნობეთ ექიმს თუ იღებთ რომელიმე ამ მედიკამენტს.

პროსნიქსი D საკვებთან ერთად

პროსნიქსი D-ს მიღება უნდა მოხდეს ყოველ დღე ერთი და იმავე დროს კვებიდან 30 წუთის შემდეგ.

ორსულობა, ძუძუთი კვება და ფერტილობა

პროსნიქსი D არ უნდა მიიღონ ქალებმა.

ქალები, რომლებიც არიან ორსულად (ან შეიძლება იყონ) არ უნდა შეეხონ გაჟონილ კაფსულებს. დუტასტერიდი კანის საშუალებით შესაძლოა შეიწოვოს ორგანიზმის მიერ და იმოქმედოს მამრობითი სქესის ბავშვის განვითარებაზე. ეს განსაკუთრებით სარისკოა ორსულობის პირველ 16 კვირის ვადაში.

სქესობრივი კავშირის დროს გამოიყენეთ პრეზერვატივი.

დუტასტერიდი ნაპოვნია მამაკაცთა სპერმაში, რომლებიც იღებენ პროსნიქსი D-ს. თავიდან უნდა იქნას აცილებული პარტნიორის ორგანიზმში სპერმის მოხვედრა.

პროსნიქსი D ამცირებს სპერმის რაოდენობას, სპერმის მოცულობას და სპერმის მოძრაობას. ამდენად მამრობითი სქესის ფერტილობა შესაძლოა შემცირდეს.

აცნობეთ ექიმს რჩევისათვის თუ ორსულ ქალს კონტაქტი ჰქონდა პროსნიქსი D-სთან.

ავტომობილებისა და მექანიზმების მართვა

პროსნიქსი Dზოგიერთ პირში იწვევს თავბრუსხვევას, რამაც შეიძლება გავლენა მოახდინოს ავტომობილის მართვის უნარზე ან მექანიზმების უსაფრთხო მუშაობაზე.

აღნიშნული ეფექტების გამოვლენის შემთხვევაში არ მართოთ ავტომობილი და მექანიზმები.

პროსნიქსი D შეიცავს ლაქტოზას

ეს მედიკამენტი შეიცავს ლაქტოზას. თუ გაქვთ შაქრის აუტანლობა, აღნიშნული მედიკამენტის მიღებამდე აცნობეთ ექიმს.

მიღების წესი

პროსნიქსი D ყოველთვის მიიღეთ  ექიმის ან ფარმაცევტის ზუსტი რეკომენდაციით. მედიკამენტის არარეგულარულად  მიღებამ შესაძლოა გავლენა მოახდინოს PSA-ს დონის მონიტორინგზე.

რეკომენდირებული დოზაა  ერთი კაფსულა დღეში ერთხელ, ყოველდღიურად ერთი და იმავე დროს, საჭმლის მიღებიდან 30 წუთის შემდეგ

მთლიანი კაფსულა გადაყლაპეთ წყალთან ერთად. არ დაღეჭოთ ან გატეხოთ, არ გახსნათ კაფსულა. კაფსულის შემადგენლობის კონტაქტმა შესაძლოა გამოიწვიო პირის ან ყელის ტკივილი.

დოზის გადაჭარბება

დუტასტერიდი/ტამსულოზინის ჰიდროქლორიდის კაფსულების დოზის გადაჭარბების შემთხვევაში დაუკავშირდით  ექიმს ან ფარმაცევტს რჩევისათვის.

დოზის გამოტოვება

არ მიიღოთ ორმაგი დოზა დავიწყებული დოზის სანაცვლოდ. შემდეგი დოზა მიიღეთ ჩვეულ დროს.

მკურნალობის შეწყვეტა

არ შეწყვიტოთ პროსნიქსი D-ს მიღება ექიმთან კონსულტაციის გარეშე. მედიკამენტის მოხმარებასთან დაკავშირებით, დამატებითი შეკითხვების შემთხვევაში, მიმართეთ  ექიმს ან ფარმაცევტს.

შესაძლო გვერდითი მოვლენები

ყველა მედიკამენტის მსგავსად, ამ მედიკამენტმაც შესაძლოა გამოიწვიოს გვერდითი მოვლენები, თუმცა არა ყველა პაციენტის შემთხვევაში.

ალერგიული რეაქცია

ალერგიული რეაქციის ნიშნები შესაძლოა მოიცავდეს:

–         გამონაყარი კანზე (შესაძლოა ქავილი);

–         ჭინჭრის ციება;

–         ქუთუთოების, სახის, ტუჩების, ხელების ან ფეხების შეშუპება.

ამ სიმპტომების გამოვლენისას, დაუყოვნებლივ დაკავშირდით ექიმს და შეწყვიტეთ პროსნიქსი D-ს გამოყენება.

თავბრუსხვევა, გონების დაბინდვა და  დაკარგვა

პროსნიქსი D-მ შეიძლება გამოიწვიოს თავბრუსხვევა, გონების დაბინდვა და იშვიათ შემთხვევაში  გონების დაკარგვა.  სიფრთხილეა საჭირო დაწოლილი ან დამჯდარი მდგომარეობიდან მოძრაობის უეცარი დაწყებისას, განსაკუთრებით  ღამე გამოღვიძების შემდეგ წამოდგომისას, ვიდრე არ გეცოდინებათ თუ როგორ მოქმედებს ეს მედიკამენტი. მკურნალობის ნებისმიერ დროს   თავბრუსხვევის შეგრძნებისას ან გონების დაბინდვის შემთხვევაში, დაჯექით ან დაწექით სანამ სიმტომი გაივლის.

კანის სერიოზული რეაქციები

სერიოზული კანის რეაქციები შესაძლოა მოიცავდეს:

გავრცელებული გამონაყარი ბუშტუკებით და კანის აქერცვლით, განსაკუთრებით, პირის ღრუს, ცხვირის, თვალებისა და სასქესო ორგანოების გარშემო (სტივენ-ჯონსონის სინდრომი).

ამ სიმპტომების გამოვლენისას დაუყოვნებლივ დაუკავშირდით ექიმს  და შეწყვიტეთ პროსნიქსი D-ს გამოყენება.

ხშირი გვერდითი მოვლენები

შესაძლოა  გამოვლინდეს 10-დან 1-ზე ნაკლებ მამაკაცში, ვინც იღებს პროსნიქსი D-ს.

–         იმპოტენცია (შეუძლებელია ერექციის მიღწევა ან შენარჩუნება);

–         შემცირებული სქესობრივი კავშირი (ლიბიდო);

–         ეაკულაციის სირთულე, როგორიცაა სექსის დროს გამოყოფილი სპერმის რაოდენობის შემცირება;

–         მკერდის გადიდება ან ტკივილი (გინეკომასტია);

–         თავბრუსხვევა.

მცირე რაოდენობის პაციენტებში ზოგიერთი ეს მოვლენა შეიძლება გაგრძელდეს  პროსნიქსი D-ს მკურნალობის შეწყვეტის შემდეგაც.

არახშირიგვერდითი მოვლენები

შესაძლოა 100 მამაკაციდან გამოვლინდეს 1-მდე პაციენტში.

–         გულის უკმარისობა  (გულიდან ორგანიზმს სისხლი შემცირებული ნაკადით მიეწოდება. შესაძლოა აღინიშნოს სიმპტომები, როგორიცაა სუნთქვის გახშირება, მეტისმეტი დაღლილობა, წვივების და ფეხების შეშუპება);

–         დგომისას დაბალი არტერიული წნევა;

–         აჩქარებული გულისცემა (პალპიტაცია);

–         ყაბზობა, დიარეა, ღებინება, გულისრევა;

–         სისუსტე ან ძალის დაკარგვა;

–         თავის ტკივილი;

–         ცხვირის ქავილი, გაჭედვა ან სურდო (რინიტი);

–         გამონაყარი კანზე, ჭინჭრის ციება, ქავილი.

იშვიათი გვერდითი მოვლენები

შესაძლოა  გამოვლინდეს 1000 მამაკაციდან 1-მდე პაციენტში.

–         ქუთუთოების, სახის, ტუჩების, ხელების ან ფეხების შეშუპება;

–         გონების დაკარგვა.

ძალიან იშვიათი გვერდითი მოვლენები

შესაძლოა გამოვლინდეს 10 000 პაციენტიდან  1-მდე მამაკაცში.

–         შენარჩუნებული მტკივნეული ერექცია (პრიაპისზმი);

–         კანის რთული რეაქციები (სტივენს-ჯონსონის-სინდრომი).

სხვა გერდითი მოვლენები

სხვა გვერდითი ეფექტები გამოვლინდა მცირე ჯგუფში, რომლის დროსაც შეუძლებელია ზუსტი გამოვლენის სიხშირის დადგენა (სიხშირის დადგენა შეუძლებელია არსებული მონაცემების მიხედვით):

–         ანომალიური ან აჩქარებული გულისცემა (არითმია ან ტაქიკარდია ან წინაგულების ციმციმი);

–         სუნთქვის გართულება (დისპნოე);

–         დეპრესია;

–         ტკივილი და შეშუპება სათესლე ჯირკვლებზე;

–         ცხვირიდან სისხლდენა;

–         კანის რთული რეაქციები;

–         მხედველობის დარღვევები (დაბინდული მხედველობა ან მხედველობის დაქვეითება);

–         პირის სიმშრალე.

გვერდითი მოვლენების შეტყობინება

გვერდითი მოვლენების აღმოჩენის შემთხვევაში მიმართეთ  ექიმს ან ფარმაცევტს. მათ შორის ისეთი გვერდითი მოვლენების შემთხვევაშიც, რომლებიც ზემოთ არ არის ჩამოთვლილი. გვერდითი მოვლენების შესახებ შეტყობინება ხელს შეუწყობს ამ მედიკამენტის უსაფრთხოების შესახებ მეტი ინფორმაციის მიღებას.

შენახვის წესი

შეინახეთ 20-27⁰C ტემპერატურაზე. სინათლისა და ნესტისაგან დაცულ, ბავშვებისათვის მიუწვდომელ ადგილას.

არ მიიღოთ ეს მედიკამენტი ვადის გასვლის შემდეგ, რომელიც მითითებულია კოლოფზე EXP- ის აღნიშვნის შემდეგ. ვადის გასვლის თარიღი ეხება თვის ბოლო დღეს.

ნუ გადააგდებთ წამლებს ჩამდინარე წყლების ან საყოფაცხოვრებო ნარჩენების საშუალებით. ჰკითხეთ ფარმაცევტს, თუ როგორ უნდა მოიშოროთ უსარგებლო წამლები. ეს ზომები ხელს შეუწყობს გარემოს დაცვას.

გარეგნული აღწერა და შეფუთვა

მწვანე/მწვანე ფერის "0" ზომის მყარი ჟელატინის კაფსულა შეიცავს  წითელი ფერის მრგვალი ფორმის ორმხრივ ამოზნექილ, ორივე მხრიდან ჩვეულებრივი ტაბლეტებს და თეთრი ფერის გრანულებს.

შეფუთვის ზომა: 30 კაპსულა (3x10 ალუ-ალუ ბლისტერი).

გაცემის წესი

ფარმაცევტული პროდუქტის ჯგუფი II, გაიცემა ფორმა №3 რეცეპტით.

მწარმოებელი

შპს Phoenix Biologicals Pvt.,

R.S.No.135 / 2B, კოტაფურინატამის გზა/Kothapurinatham Road,

Thiruvandar Koil, Puducherry, 605102,

ინდოეთი.