ატორვასტატინი 10მგ #30ტ

ატორვასტატინი

ATORVASTATIN

შემადგენლობა

აპკიანი გარსით დაფარული თითოეული ტაბლეტი შეიცავს:

ატორვასტატინ კალციუმი USP, 10 მგ ატორვასტატინის ეკვივალენტური.          

დამხმარე ნივთიერებები: ლაქტოზა უწყლო, მიკროკრისტალური ცელულოზა, გასუფთავებული ტალკი, მაგნიუმის სტეარატი,  ნატრიუმის კროსკარმელოზა, ნატრიუმის სახამებლის გლიკოლატი, სილიციუმის კოლოიდური დიოქსიდი,  სიმინდის სახამებელი, პოვიდონი,  მეთილ პარაბენ ნატრიუმი, პროპილ პარაბენ ნატრიუმი.

შემომგარსავი ნივთიერებები: ტიტანიუმის დიოქსიდი, პოვიდონი, გასუფთავებული ტალკი, პოლიეთილენ გლიკოლი-6000, ჰიდროქსიპროპილ მეთილ ცელულოზა, ალკოჰოლის იზოპროპილი, მეთილენის დიქლორიდი. 

ფარმაცევტული  ფორმა

აპკიანი გარსით დაფარული ტაბლეტები, 10 მგ.

თეთრი ფერის, მრგვალი ფორმის, ორმხრივამოზნექილი აპკიანი გარსით დაფარული ტაბლეტი, ორივე მხარეს გლუვი ზედაპირით.

ფარმაკოთერაპიულიჯგუფი

ლიპიდური ცვლის მამოდიფიცირებელი საშუალებები, HMG-CoA რედუქტაზას ინჰიბიტორები.

ათქ კოდი: C10AA05.

ფარმაკოლოგიური თვისებები

ფარმაკოდინამიკური თვისებები

ატორვასტატინი არის HMG-CoA რედუქტაზას სელექციური კონკურენტული ინჰიბიტორი, სიჩქარის შემზღუდველი ფერმენტი, რომელიც პასუხისმგებელია

3-ჰიდროქსი-3-მეთილ-გლუტარილ-კოენზიმ A-ს მევალონატად გარდაქმნაზე, სტეროლების წინამორბედი, მათ შორის ქოლესტერინის. ღვიძლში ტრიგლიცერიდები და ქოლესტერინი ინკორპორირებულია ძალიან დაბალი სიმკვრივის ლიპოპროტეინებში (VLDL) და გამოიყოფა სისხლის პლაზმაში პერიფერიულ ქსოვილებში მიწოდებისთვის. დაბალი სიმკვრივის ლიპოპროტეინი (LDL) წარმოიქმნება VLDL-დან და კატაბოლიზდება ძირითადად მაღალი აფინურობის LDL რეცეპტორის (LDL რეცეპტორის) მეშვეობით.

ატორვასტატინი ამცირებს LDL გამომუშავებას და LDL ნაწილაკების რაოდენობას. ატორვასტატინი აწარმოებს LDL რეცეპტორების აქტივობის ღრმა და მდგრად ზრდას, რასაც თან ახლავს მოცირკულირე LDL ნაწილაკების ხარისხის უკეთესობისკენ ცვლილება. ატორვასტატინი ეფექტურად აქვეითებს LDL-ქოლესტერინის დონეს ჰომოზიგოტური ოჯახური ჰიპერქოლესტერინემიის მქონე პაციენტებში, პოპულაციაში, რომელიც, როგორც წესი, არ რეაგირებს ლიპიდების დამწევ საშუალებებზე.

ფარმაკოკინეტიკური თვისებები

აბსორბცია

ატორვასტატინი სწრაფად შეიწოვება პერორალური მიღების შემდეგ; მაქსიმალური პლაზმური კონცენტრაცია (Cmax) მიიღწევა 1-დან 2 საათამდე. აბსორბციის ხარისხი იზრდება ატორვასტატინის დოზის პროპორციულად. პერორალური მიღების შემდეგ, ატორვასტატინის აპკიანი გარსით დაფარული ტაბლეტები პერორალურ ხსნართან შედარებით ბიოშეღწევადია 95%-დან 99%-მდე. ატორვასტატინის აბსოლუტური ბიოშეღწევადობა არის დაახლოებით 12%, ხოლო HMG-CoA რედუქტაზას ინჰიბიტორული აქტივობის სისტემური ხელმისაწვდომობა არის დაახლოებით 30%. დაბალი სისტემური ხელმისაწვდომობა მიეკუთვნება პრესისტემურ კლირენსს კუჭ-ნაწლავის ლორწოვან გარსში და/ან ღვიძლის პირველი გავლის მეტაბოლიზმს.

განაწილება

ატორვასტატინის განაწილების საშუალო მოცულობა შეადგენს დაახლოებით 381 ლ. ატორვასტატინი ≥ 98% უკავშირდება პლაზმის ცილებს.

ბიოტრანსფორმაცია

ატორვასტატინი მეტაბოლიზდება ციტოქრომ P4503A4-ით ორთო- და პარაჰიდროქსილირებულ წარმოებულებად და სხვადასხვა ბეტა-ჟანგვის პროდუქტებად. გარდა სხვა გზებისა, ეს პროდუქტები შემდგომში მეტაბოლიზდება გლუკურონიდაციის გზით. ინ ვიტრო, HMG-CoA რედუქტაზას ინჰიბირება ორთო- და პარაჰიდროქსილირებული მეტაბოლიტების მიერ ატორვასტატინის ტოლფასია. HMG-CoA რედუქტაზას მოცირკულირე ინჰიბიტორული აქტივობის დაახლოებით 70% მიეკუთვნება აქტიურ მეტაბოლიტებს.

გამოყოფა

ატორვასტატინი გამოიყოფა ძირითადად ნაღველში ღვიძლის და/ან ღვიძლისმიერი მეტაბოლიზმის შემდეგ. თუმცა, როგორც ჩანს, ატორვასტატინი არ განიცდის მნიშვნელოვან ენტეროჰეპატურ რეცირკულაციას. ადამიანებში ატორვასტატინის საშუალო პლაზმური ნახევარგამოყოფის პერიოდი შეადგენს დაახლოებით 14 საათს. HMG-CoA რედუქტაზას ინჰიბიტორული აქტივობის ნახევარგამოყოფის პერიოდი შეადგენს დაახლოებით 20-30 საათს.

განსაკუთრებული პოპულაცია

ხანდაზმულები

ატორვასტატინის და მისი აქტიური მეტაბოლიტების პლაზმური კონცენტრაციები უფრო მაღალია ჯანმრთელ ხანდაზმულებში, ვიდრე ახალგაზრდებში, ამასთან ლიპიდური ეფექტები იყო ახალგაზრდა პაციენტების პოპულაციის მსგავსი.

პედიატრიული პოპულაცია

სხეულის წონა იყო ერთადერთი მნიშვნელოვანი კრიტერიუმი ატორვასტატინის პოპულაციის ფარმაკოკინეტიკურ მოდელში. ატორვასტატინის აშკარა პერორალური კლირენსი პედიატრიულ სუბიექტებში იყო მოზრდილების მსგავსი.

სქესი

ატორვასტატინის და მისი აქტიური მეტაბოლიტების კონცენტრაცია ქალებში განსხვავდება კაცებისგან (ქალები: Cmax დაახლოებით 20%-ით მაღალი და AUC-ისთვის დაახლოებით 10%-ით დაბალი). ამ განსხვავებებს არ ჰქონდა კლინიკური მნიშვნელობა, რის შედეგადაც არ იყო კლინიკურად მნიშვნელოვანი განსხვავებები ლიპიდურ ეფექტებში მამაკაცებსა და ქალებში.

თირკმლის უკმარისობა

თირკმლების დაავადება არ ახდენს გავლენას ატორვასტატინის და მისი აქტიური მეტაბოლიტების პლაზმურ კონცენტრაციაზე ან ლიპიდურ ეფექტზე.

ღვიძლის უკმარისობა

ატორვასტატინის და მისი აქტიური მეტაბოლიტების პლაზმური კონცენტრაციები საგრძნობლად მაღალია (დაახლოებით 16-ჯერ Cmax-ში და დაახლოებით 11-ჯერ AUC-ში) პაციენტებში ღვიძლის ქრონიკული ალკოჰოლური დაავადებით (Child-Pugh B).

თერაპიული ჩვენებები

ჰიპერქოლესტერინემია

ატორვასტატინის ტაბლეტი ნაჩვენებია როგორც დიეტის დანამატი მომატებული საერთო ქოლესტერინის (TC), LDL-ქოლესტერინის (LDL-C), აპოლიპოპროტეინი B-ს და ტრიგლიცერიდების შესამცირებლად ზრდასრულებში,  მოზარდებში და 10 წელზე უფროსი ასაკის ბავშვებში პირველადი ჰიპერქოლესტერინემიით, მათ შორის ჰიპერქოლესტერინემია (ჰეტეროზიგოტური ტიპი) ან კომბინირებული (შერეული) ჰიპერლიპიდემია (შეესაბამება ფრედრიქსონის კლასიფიკაციით IIa და IIb ტიპებს), როდესაც რეაქცია დიეტაზე და სხვა არაფარმაკოლოგიურ ღონისძიებებზე არადამაკმაყოფილებელია. ატორვასტატინის ტაბლეტი ასევე ნაჩვენებია საერთო ქოლესტერინის და LDL-ქოლესტერინის შესამცირებლად მოზრდილებში ჰომოზიგოტური ოჯახური ჰიპერქოლესტერინემიით, სხვა, ლიპიდების შესამცირებელი მკურნალობის მეთოდზე დამატებითი მკურნალობის სახით (მაგ. LDL აფერეზი), ან იმ შემთხვევაში, თუ ასეთი სახის მკურნალობის მეთოდი მიუწვდომელია.

გულ-სისხლძარღვთა დაავადებების პრევენცია

გულ-სისხლძარღვთა მოვლენების პრევენცია ზრდასრულ პაციენტებში, რომელთაც აქვთ, სავარაუდო, პირველადი გულ-სისხლძარღვთა მოვლენის მაღალი რისკი, როგორც დამატებითი რისკ-ფაქტორების კორექცია.

დოზირება და გამოყენების წესი

დოზირება

ატორვასტატინის ტაბლეტების მიღებამდე, პაციენტი უნდა დაექვემდებაროს სტანდარტულ დიეტას, რათა შემცირდეს ქოლესტერინის დონე; დიეტა უნდა გაგრძელდეს ატორვასტატინით მკურნალობის პერიოდშიც.

დოზა ინდივიდუალურად უნდა შეირჩეს დაბალი სიმკვრივის ლიპოპროტეინების ქოლესტერინის საწყისი დონის, თერაპიის მიზნისა და პაციენტის რეაქციის მიხედვით.

ჩვეულებრივი საწყისი დოზაა 10 მგ დღეში ერთხელ. დოზის კორექცია უნდა განხორციელდეს 4 კვირის ან მეტი ინტერვალით. მაქსიმალური დოზაა 80 მგ დღეში ერთხელ.

პირველადი ჰიპერქოლესტერინემია და კომბინირებული (შერეული) ჰიპერლიპიდემია

პაციენტების უმრავლესობაში მდგომარეობა კონტროლდება ატორვასტატინის ტაბლეტით 10 მგ დღეში ერთხელ.  თერაპიული რეაქცია აშკარაა 2 კვირაში, ხოლო მაქსიმალური თერაპიული რეაქცია მიიღწევა 4 კვირაში. რეაქცია შენარჩუნებულია ქრონიკული თერაპიის განმავლობაში.

ჰეტეროზიგოტური ოჯახური ჰიპერქოლესტერინემია

პაციენტებმა უნდა დაიწყონ ატორვასტატინის მიღება დოზით 10 მგ  დღეში. დოზები უნდა იყოს ინდივიდუალურად დანიშნული და დაკორექტირებული ყოველ 4 კვირაში 40 მგ-მდე დღეში. ამის შემდეგ, დოზა შეიძლება გაიზარდოს მაქსიმუმ 80 მგ-მდე დღეში, ან ნაღვლის მჟავის სეკვესტრანტი შეიძლება იყოს კომბინირებული 40 მგ ატორვასტატინთან დღეში ერთხელ.

ჰომოზიგოტური ოჯახური ჰიპერქოლესტერინემია

ჰომოზიგოტური ოჯახური ჰიპერქოლესტერინემიის მქონე  პაციენტებში ატორვასტატინის დოზა შეადგენს 10 მგ-დან 80 მგ- დე დღეში. ატორვასტატინი უნდა იქნას გამოყენებული ამ პაციენტებში, როგორც  დანამატი ლიპიდების შემამცირებელ სხვა საშუალებებთან ერთად (მაგ.LDL აფერეზი) ან  თუ ასეთი მკურნალობა მიუწვდომელია.

გულ-სისხლძარღვთა დაავადებების პრევენცია

პირველადი პრევენციის კვლევებში დოზა იყო 10 მგ/დღეში. უფრო მაღალი დოზები შეიძლება საჭირო გახდეს LDL-ქოლესტერინის დონის მისაღწევად მიმდინარე გაიდლაინების მიხედვით.

თირკმლის უკმარისობა

დოზის კორექცია საჭირო არ არის.

ღვიძლის უკმარისობა

ატორვასტატინის ტაბლეტი სიფრთხილით უნდა იქნას გამოყენებული ღვიძლის ფუნქციის დარღვევის მქონე პაციენტებში. ატორვასტატინის ტაბლეტი უკუნაჩვენებია ღვიძლის აქტიური დაავადების მქონე პაციენტებში.

სხვა მედიკამენტებთან ერთად მიღება

პაციენტებში, რომლებიც იღებენ C ჰეპატიტის სამკურნალო ანტივირუსულ საშუალებებს ელბასვირი/გრაზოპრევირი ან ლეტერმოვირი ციტომეგალოვირუსული ინფექციის პროფილაქტიკისთვის ატორვასტატინთან ერთად, ატორვასტატინის დოზა არ უნდა აღემატებოდეს 20 მგ/დღეში.

ატორვასტატინის გამოყენება არ არის რეკომენდებული პაციენტებში, რომლებიც იღებენ ლეტერმოვირს ციკლოსპორინთან ერთად.

ხანდაზმულები

ეფექტურობა და უსაფრთხოება 70 წელზე უფროსი ასაკის პაციენტებში, რომლებიც იყენებენ რეკომენდებულ დოზებს, მსგავსია საერთო პოპულაციაში.

პედიატრიული პოპულაცია

ჰიპერქოლესტერინემია

პედიატრიული გამოყენება უნდა განხორციელდეს მხოლოდ პედიატრიული ჰიპერლიპიდემიის მკურნალობაში გამოცდილი ექიმების მიერ და პროგრესის შესაფასებლად პაციენტები რეგულარულად უნდა მოწმდებოდნენ.

10 წელზე უფროსი ასაკის ჰეტეროზიგოტური ოჯახური ჰიპერქოლესტერინემიის მქონე პაციენტებისთვის ატორვასტატინის რეკომენდებული საწყისი დოზაა 10 მგ დღეში. დოზა შეიძლება გაიზარდოს 80 მგ-მდე დღეში, რეაქციის და ტოლერანტობის მიხედვით. დოზები ინდივიდუალურად უნდა შეირჩეს თერაპიის რეკომენდებული მიზნის მიხედვით. კორექტირება უნდა განხორციელდეს 4 კვირის ან მეტი ინტერვალით. დოზის ტიტრაცია 80 მგ-მდე დღეში მხარდაჭერილია კვლევის მონაცემებით მოზრდილებში და შეზღუდულია კლინიკური მონაცემებით ბავშვებში ჰეტეროზიგოტური ოჯახური ჰიპერქოლესტერინემიით.

შეზღუდული უსაფრთხოებისა და ეფექტურობის მონაცემები ბავშვებში ჰეტეროზიგოტური ოჯახური ჰიპერქოლესტერინემიით, მიღებული 6-დან 10 წლამდე ასაკის ბავშვებში ღია კვლევებიდან. ატორვასტატინი არ ინიშნება 10 წლამდე ასაკის პაციენტების სამკურნალოდ.

სხვა ფარმაცევტული ფორმები/ძლიერი საშუალებები შეიძლება  უფრო შესაფერისი იყოს ამ პოპულაციისთვის.

მიღების წესი

ატორვასტატინის ტაბლეტი განკუთვნილია პერორალური მიღებისთვის. ატორვასტატინის ყოველი დღიური დოზა მიიღება ერთდროულად და შეიძლება მიღებულ იქნას დღის ნებისმიერ დროს საკვებთან ერთად ან მის გარეშე.

არასასურველი ეფექტები

კლინიკური კვლევებისა და ვრცელი პოსტმარკეტინგული გამოცდილების საფუძველზე, ქვემოთ მოცემულია ატორვასტატინის ტაბლეტის გვერდითი რეაქციების პროფილი.

რეაქციების სავარაუდო სიხშირეები დალაგებულია შემდეგი კონვენციის მიხედვით: ხშირი (≥ 1/100, < 1/10); არახშირი (≥ 1/1000, < 1/100); იშვიათი (≥ 1/10,000, < 1/1,000); ძალიან იშვიათი (<1/10,000), უცნობი (შეუძლებელია შეფასდეს არსებული მონაცემებით).

ინფექციები და ინვაზიები

ხშირი: ნაზოფარინგიტი.

სისხლისა და ლიმფური სისტემის დარღვევები

იშვიათი: თრომბოციტოპენია.

იმუნური სისტემის დარღვევები

ხშირი: ალერგიული რეაქციები.

ძალიან იშვიათად: ანაფილაქსია.

მეტაბოლიზმის და კვების დარღვევები

ხშირი: ჰიპერგლიკემია.

არახშირი: ჰიპოგლიკემია, წონის მომატება, ანორექსია.

ფსიქიატრიული დარღვევები

არახშირი: კოშმარი, უძილობა.

ნერვული სისტემის დარღვევები

ხშირი: თავის ტკივილი

არახშირი: თავბრუსხვევა, პარესთეზია, ჰიპოესთეზია, დისგევზია, ამნეზია.

იშვიათი: პერიფერიული ნეიროპათია.

უცნობია: მიასთენია გრავისი.

თვალის დარღვევები

არახშირი: ბუნდოვანი მხედველობა.

იშვიათი: მხედველობის დარღვევა.

უცნობია: თვალის მიასთენია.

ყურის და ლაბირინტის დარღვევები

არახშირი: ტინიტუსი.

ძალიან იშვიათი: სმენის დაქვეითება.

სუნთქვის, გულმკერდის და შუასაყრის დარღვევები

ხშირი: ფარინგოლარინგეალური ტკივილი, ეპისტაქსია.

კუჭ-ნაწლავის დარღვევები

ხშირი: ყაბზობა, მეტეორიზმი, დისპეპსია, გულისრევა, დიარეა.

არახშირი: ღებინება, ტკივილი მუცლის ზედა და ქვედა ნაწილში, ბოყინი, პანკრეატიტი.

ჰეპატობილიარული დარღვევები

არახშირი: ჰეპატიტი,

იშვიათი: ქოლესტაზი

ძალიან იშვიათი: ღვიძლის უკმარისობა.

კანის და კანქვეშა ქსოვილის დარღვევები

არახშირი: ჭინჭრის ციება, გამონაყარი კანზე, ქავილი, ალოპეცია.

იშვიათი: ანგიონევროზული შეშუპება, ბულოზური დერმატიტი მულტიფორმული  ერითემის ჩათვლით, სტივენს-ჯონსონის სინდრომი და ტოქსიკური ეპიდერმული ნეკროლიზი.

კუნთოვანი და შემაერთებელი ქსოვილის დარღვევები

ხშირი: მიალგია, არტრალგია, ტკივილი კიდურებში, კუნთების სპაზმი, სახსრების შეშუპება, ზურგის ტკივილი.

არახშირი: კისრის ტკივილი, კუნთების სისუსტე.

იშვიათი:მიოპათია, მიოზიტი, რაბდომიოლიზი, კუნთების რღვევა, ტენდონოპათია.

ძალიან იშვიათი: ლუპუსის მსგავსი სინდრომი.

უცნობია: იმუნური ნეკროზული მიოპათია.

რეპროდუქციული სისტემის და მკერდის დარღვევები

ძალიან იშვიათი: გინეკომასტია.

ზოგადი დარღვევები

იშვიათი: სისუსტე, ასთენია, გულმკერდის ტკივილი, პერიფერიული შეშუპება, დაღლილობა, პირექსია.

კლევები

ხშირი: ღვიძლის ფუნქციური ტესტის დარღვევა, სისხლში კრეატინკინაზას მომატება.

იშვიათი: შარდში დადებითი სისხლის თეთრი უჯრედები.

პედიატრიული პოპულაცია

10-დან 17 წლამდე ასაკის პედიატრიულ პაციენტებს, რომლებიც მკურნალობდნენ ატორვასტატინით, როგორც წესი ჰქონდათ პლაცებოთი ნამკურნალევი პაციენტების მსგავსი გვერდითი მოვლენების პროფილი, ორივე ჯგუფში დაფიქსირებული ყველაზე ხშირი გვერდითი მოვლენები, მიზეზობრიობის შეფასების მიუხედავად, იყო ინფექციები. არ დაფიქსირდა კლინიკურად მნიშვნელოვანი გავლენა ზრდასა და სქესობრივ მომწიფებაზე 3-წლიან კვლევაში, რომელიც დაფუძნებულია საერთო მომწიფების და განვითარების შეფასებაზე, ტანერის სტადიის შეფასებაზე და სიმაღლისა და წონის გაზომვაზე. უსაფრთხოების და ტოლერანტობის პროფილი პედიატრიულ პაციენტებში მსგავსი იყო ზრდასრულ პაციენტებში ატორვასტატინის ცნობილი უსაფრთხოების პროფილის.

ზოგიერთი სტატინის გამოყენებისას დაფიქსირდა შემდეგი არასასურველი მოვლენები:

• სექსუალური დისფუნქცია.
• დეპრესია.
• ფილტვების ინტერსტიციული დაავადების გამონაკლისი შემთხვევები, განსაკუთრებით ხანგრძლივი თერაპიის დროს.
• შაქრიანი დიაბეტი: სიხშირე დამოკიდებული იქნება რისკის ფაქტორების არსებობაზე ან არარსებობაზე (უზმოზე, სისხლში გლუკოზის დონე ≥ 5.6 mmol/L, BMI>30კგ/მ², მომატებული ტრიგლიცერიდები, ჰიპერტენზია ანამნეზში).

უკუჩვენებები

ატორვასტატინის ტაბლეტები უკუნაჩვენებია პაციენტებში:

• ჰიპერმგრძნობელობით აქტიური ნივთიერების ან რომელიმე დამხმარე ნივთიერების მიმართ.
• ღვიძლის აქტიური დაავადებით ან შრატში ტრანსამინაზების აუხსნელი მუდმივი მატებით, რომელიც 3-ჯერ აღემატება ნორმის ზედა ზღვარს.
• ორსულობის დროს, ძუძუთი კვების პერიოდში და რეპროდუქციული ასაკის ქალებში, რომლებიც არ იყენებენ შესაბამის კონტრაცეპტივებს.
• C ჰეპატიტის ანტივირუსული საშუალებებით გლეკაპრევირი/პიბრენტასვირი ნამკურნალევი პაციენტები.
• 10 წლამდე ბავშვები.

ურთიერთქმედება სხვა სამკურნალო საშუალებებთან და ურთიერთქმედების სხვა ფორმები

ერთობლივი მიღების სამკურნალო საშუალებების ეფექტი ატორვასტატინზე

CYP3A4-ის ან სატრანსპორტო ცილების ინჰიბიტორების სამკურნალო საშუალებების ერთდროულმა გამოყენებამ შეიძლება გამოიწვიოს ატორვასტატინის პლაზმური კონცენტრაციის მომატება და მიოპათიის განვითარების რისკი. რისკი შეიძლება ასევე გაიზარდოს ატორვასტატინის სხვა სამკურნალო საშუალებებთან ერთად მიღებისას, რომლებსაც აქვთ მიოპათიის გამოწვევის პოტენციალი, როგორიცაა ფიბრომჟავას წარმოებულები და ეზეტიმიბი.

CYP3A4 ინჰიბიტორები

ნაჩვენებია, რომ CYP3A4 ძლიერი ინჰიბიტორები იწვევს ატორვასტატინის კონცენტრაციის მკვეთრად გაზრდას. CYP3A4 ძლიერი ინჰიბიტორების (მაგ.: ციკლოსპორინი, ტელითრომიცინი, კლარითრომიცინი, დელავირდინი, სტირიპენტოლი, კეტოკონაზოლი, ვორიკონაზოლი, იტრაკონაზოლი, პოსაკონაზოლი, ზოგიერთი ანტივირუსული პრეპარატი, რომლებიც გამოიყენება HCV-ს სამკურნალოდ (მაგ. ელბასვირი/გრაზოპრევირი), და აივ პროტეაზას ინჰიბიტორები, მათ შორის რიტონავირი, ლოპინავირი, ატაზანავირი, ინდინავირი, დარუნავირი და ა.შ.) თავიდან უნდა იქნას აცილებული, თუ ეს შესაძლებელია. იმ შემთხვევებში, როდესაც ამ მედიკამენტების ატორვასტატინთან ერთდროული მიღების თავიდან აცილება შეუძლებელია, უნდა იქნას გათვალისწინებული ატორვასტატინის დაბალი საწყისი და მაქსიმალური დოზები და რეკომენდებულია პაციენტის შესაბამისი კლინიკური მონიტორინგი.

CYP3A4 ინდუქტორები

ატორვასტატინის ერთდროულმა გამოყენებამ ციტოქრომ P450 3A-ს ინდუქტორებთან (მაგ.: ეფავირენცი, რიფამპინი, წმინდა იოანეს ვორტი) შეიძლება გამოიწვიოს ატორვასტატინის პლაზმური კონცენტრაციების ცვლადი შემცირება. რიფამპინის ორმაგი ურთიერთქმედების მექანიზმის გამო (ციტოქრომ P450 3A ინდუქცია და ჰეპატოციტების შეწოვის გადამყვანის OATP1B1 ინჰიბირება), რეკომენდებულია ატორვასტატინის ერთდროული გამოყენება რიფამპინთან, რადგან ატორვასტატინის დაგვიანებული მიღება რიფამპინის შემდეგ დაკავშირებულია ატორვასტატინის პლაზმის კონცენტრაციებში მნიშვნელოვან შემცირებასთან. თუმცა, რიფამპინის ეფექტი ჰეპატოციტებში ატორვასტატინის კონცენტრაციაზე უცნობია და თუ მათი ერთდროული მიღების თავიდან აცილება შეუძლებელია, პაციენტები უნდა იყვნენ მჭიდრო დაკვირვების ქვეშ ეფექტურობისთვის.

ეზეტიმიბი

მარტო ეზეტიმიბის გამოყენება დაკავშირებულია კუნთებთან დაკავშირებულ მოვლენებთან, მათ შორის რაბდომიოლიზთან. ამრიგად, ამ მოვლენების რისკი შეიძლება გაიზარდოს ეზეტიმიბისა და ატორვასტატინის ერთდროული გამოყენებისას. რეკომენდებულია ამ პაციენტების შესაბამისი კლინიკური მონიტორინგი.

კოლესტიპოლი

ატორვასტატინის და მისი აქტიური მეტაბოლიტების პლაზმური კონცენტრაციები იყო უფრო დაბალი (ატორვასტატინის კონცენტრაციის თანაფარდობა: 0,74) კოლესტიპოლის ტაბლეტებთან ერთად მიღებისას. თუმცა, ლიპიდური ეფექტები უფრო დიდი იყო ატორვასტატინის ტაბლეტისა და კოლესტიპოლის ერთდროული გამოყენებისას, ვიდრე რომელიმე სამკურნალო პროდუქტის ცალკე მიღებისას.

ფუზიდისმჟავა

მიოპათიის რისკი რაბდომიოლიზის ჩათვლით შეიძლება გაიზარდოს  სისტემური ფუზიდის მჟავას  სტატინებთან ერთდროული მიღებით. ამ ურთიერთქმედების მექანიზმი (იქნება ეს ფარმაკოდინამიკური ან ფარმაკოკინეტიკური მექანიზმი ან ორივე ერთად) ჯერ უცნობია.

იყო შეტყობინებები  რაბდომიოლიზის  შესახებ (ზოგიერთი  ფატალური შემთხვევების ჩათვლით) პაციენტებში, რომლებიც იღებდნენ ამ კომბინაციას. თუ სისტემური ფუზიდის მჟავით  მკურნალობა აუცილებელია, ატორვასტატინით მკურნალობა უნდა შეწყდეს  ფუზიდის მჟავით მკურნალობის მთელი პერიოდის განმავლობაში.

კოლხიცინი

მიუხედავად იმისა, რომ ატორვასტატინთან და კოლხიცინთან ურთიერთქმედების კვლევები არ ჩატარებულა, დაფიქსირდა მიოპათიის  შემთხვევები ატორვასტატინის კოლხიცინთან ერთდროულად მიღებისას და სიფრთხილეა საჭირო  ატორვასტატინის კოლხოცინთან ერთდროულად დანიშვნისას.

ატორვასტატინის მოქმედება ერთდროულად მიღებულ სამკურნალო საშუალებებზე

დიგოქსინი

დიგოქსინის და 10 მგ ატორვასტატინის მრავალჯერადი დოზების ერთდროული მიღება იწვევს დიგოქსინის კონცენტრაციის წონასწორული მდგომარეობის ოდნავ გაზრდას. პაციენტები, რომლებიც იღებენ დიგოქსინს, უნდა იყვნენ სათანადო დაკვირვების ქვეშ.

ორალური კონტრაცეპტივები

ატორვასტატინის ტაბლეტის ერთდროული მიღება ორალურ კონტრაცეპტივთან იწვევს ნორეთინდრონისა და ეთინილ ესტრადიოლის პლაზმური კონცენტრაციების ზრდას.

ვარფარინი

კლინიკურ კვლევაში პაციენტებში რომლებიც იღებდნენ  ქრონიკულ ვარფარინით  თერაპიას, ატორვასტატინის 80 მგ დღეში გამოყენებამ ვარფარინთან ერთად გამოიწვია  პროთრომბინის დროის  მცირე დაქვეითება. მიუხედავად იმისა, რომ  აღწერილია კლინიკურად მნიშვნელოვანი ანტიკოაგულანტების ურთიერთქმედების მხოლოდ ძალიან იშვიათი  შემთხვევები, პროთრომბინის დრო უნდა განისაზღვროს ატორვასტატინით მკურნალობის დაწყებამდე პაციენტებში, რომლებიც იღებენ  კუმარინულ ანტიკოაგულანტებს, რათა უზრუნველყოფილი იქნას  პროთრომბინის დროის  მნიშვნელოვანი ცვლილება.

პედიატრიული პოპულაცია

წამლისა და წამლის ურთიერთქმედების კვლევები ჩატარდა მხოლოდ მოზრდილებში. პედიატრიულ პოპულაციაში ურთიერთქმედების ხარისხი ცნობილი არ არის. ზემოაღნიშნული ურთიერთქმედება მოზრდილებში და გაფრთხილებები

 გასათვალისწინებელია პედიატრიული პოპულაციისთვისაც.

ჭარბი დოზირება

ატორვასტატინის დოზის გადაჭარბებისთვის სპეციფიური მკურნალობა მიუწვდომელია. დოზის გადაჭარბების შემთხვევაში, პაციენტს უნდა ჩაუტარდეს სიმპტომური მკურნალობა და საჭიროებისამებრ დაინიშნოს დამხმარე ზომები. უნდა ჩატარდეს ღვიძლის ფუნქციის ტესტები და შრატში კრეატინკინაზას დონის მონიტორინგი. პლაზმის  ცილებთან ატორვასტატინის  ფართო შეკავშირების  გამო, მოსალოდნელია, რომ ჰემოდიალიზი მნიშვნელოვნად არ გაზრდის ატორვასტატინის კლირენსს.

ორსულობა, ლაქტაცია და ფერტილობა

რეპროდუქციული პოტენციალის მქონე ქალები

რეპროდუქციული ასაკის ქალებმა, მკურნალობის დროს, უნდა გამოიყენონ შესაბამისი კონტრაცეპტული მკურნალობა.

ორსულობა

ატორვასტატინის ტაბლეტი უკუნაჩვენებია ორსულობის დროს. ორსულ ქალებში უსაფრთხოება დადგენილი არ არის. ორსულ ქალებში ატორვასტატინის კონტროლირებადი კლინიკური კვლევები არ ჩატარებულა. მიღებულია იშვიათი შეტყობინებები თანდაყოლილი ანომალიების შესახებ HMG-CoA რედუქტაზას ინჰიბიტორების ინტრაუტერული ზემოქმედების შემდეგ. ცხოველებზე ჩატარებულმა კვლევებმა აჩვენა ტოქსიკურობა რეპროდუქციისთვის.

ატორვასტატინით დედის მკურნალობამ შეიძლება შეამციროს ნაყოფის მევალონატის დონე, რომელიც წარმოადგენს ქოლესტერინის ბიოსინთეზის წინამორბედს.  ათეროსკლეროზი ქრონიკული პროცესია და ორსულობის დროს ლიპიდების დამაქვეითებელი მედიკამენტების ჩვეულებრივ შეწყვეტამ მცირე გავლენა უნდა მოახდინოს პირველადი ჰიპერქოლესტერინემიასთან დაკავშირებულ გრძელვადიან რისკზე.

ამ მიზეზების გამო, ატორვასტატინის ტაბლეტი არ უნდა იქნას გამოყენებული ქალებში, რომლებიც ორსულად არიან, რომლებიც ცდილობენ დაორსულდნენ ან ეჭვობენ, რომ ორსულად არიან. ატორვასტატინის ტაბლეტებით მკურნალობა უნდა შეწყდეს ორსულობის ხანგრძლივობით ან სანამ არ დადგინდება, რომ ქალი ორსულად არ არის.

ძუძუთიკვება

ატორვასტატინი უკუნაჩვენებია ძუძუთი კვების დროს.

ფერტილობა

ცხოველებზე ჩატარებულ კვლევებში ატორვასტატინი არ ახდენს გავლენას მამაკაცის და ქალის ნაყოფიერებაზე.

სპეციალური გაფრთხილებები და სიფრთხილის ზომები გამოყენებისას

ღვიძლის უკმარისობა

ღვიძლის ფუნქციის ტესტები უნდა ჩატარდეს მკურნალობის დაწყებამდე და შემდგომ პერიოდულად. პაციენტებს, რომლებსაც განუვითარდებათ რაიმე ნიშანი ან სიმპტომი, რომელიც მიუთითებს ღვიძლის დაზიანებაზე, უნდა ჩაუტარდეთ ღვიძლის ფუნქციური ტესტები. პაციენტები, რომლებსაც განუვითარდათ ტრანსამინაზების დონის მომატება, უნდა იმყოფებოდნენ მეთვალყურეობის ქვეშ, სანამ ანომალი(ები) არ მოგვარდება. თუ ტრანსამინაზების მატება 3-ჯერ აღემატება ნორმის ზედა ზღვარს (ULN), რეკომენდებულია დოზის შემცირება ან ატორვასტატინის ტაბლეტის მიღების შეწყვეტა.

ატორვასტატინის ტაბლეტი სიფრთხილით უნდა იქნას გამოყენებული პაციენტებში, რომლებიც მოიხმარენ ალკოჰოლის მნიშვნელოვან რაოდენობას და/ან აქვთ ღვიძლის დაავადება ანამნეზში.

ინსულტის პრევენცია ქოლესტერინის დონის აგრესიული შემცირებით (SPARCL)

ინსულტის ქვეტიპების პოსტ-ჰოკ ანალიზში პაციენტებში, რომლებსაც არ ჰქონდათ გულის კორონარული დაავადება (CHD), რომლებსაც ჰქონდათ ახლო წარსულში ინსულტი ან გარდამავალი იშემიური შეტევა (TIA), პაციენტებში, რომლებიც იწყებდნენ მკურნალობას ატორვასტატინით 80 მგ იყო ჰემორაგიული ინსულტის უფრო მაღალი სიხშირე, ვიდრე პლაცებოს პაციენტებში. გაზრდილი რისკი განსაკუთრებით აღინიშნა პაციენტებში, რომლებსაც ჰქონდათ ადრე ჰემორაგიული ინსულტი ან ლაკუნარული ინფარქტი კვლევის დასაწყისში. პაციენტებისთვის, რომლებსაც აქვთ ჰემორაგიული ინსულტი ან ლაკუნარული ინფარქტი, ატორვასტატინის 80 მგ რისკებისა და სარგებლობის ბალანსი გაურკვეველია და ჰემორაგიული ინსულტის პოტენციური რისკი ყურადღებით უნდა იქნას განხილული მკურნალობის დაწყებამდე.

ჩონჩხისკუნთებზე ზემოქმედება

ატორვასტატინმა, ისევე როგორც სხვა HMG-CoA რედუქტაზას ინჰიბიტორებმა, იშვიათ შემთხვევებში შეიძლება გავლენა იქონიოს ჩონჩხის კუნთზე და გამოიწვიოს მიალგია, მიოზიტი და მიოპათია, რომელიც შეიძლება გადაიზარდოს რაბდომიოლიზში, სიცოცხლისთვის პოტენციურად საშიში მდგომარეობა, რომელიც ხასიათდება მკვეთრად მომატებული კრეატინკინაზას (CK) დონეებით (>10-ჯერ ULN), მიოგლობინემია და მიოგლობინურია, რამაც შეიძლება გამოიწვიოს თირკმლის უკმარისობა.

კრეატინკინაზას გაზომვა

კრეატინკინაზა(CK) არ უნდა გაიზომოს დაძაბული ვარჯიშის შემდეგ ან CK მომატების რაიმე სავარაუდო ალტერნატიული მიზეზის არსებობისას, რადგან ეს ართულებს მნიშვნელობის ინტერპრეტაციას. თუ CK დონე საწყის ეტაპზე საგრძნობლად არის მომატებული (> 5-ჯერ ULN), კრეატინკინაზას დონე ხელახლა უნდა გაიზომოს 5-7 დღის შემდეგ შედეგების დასადასტურებლად.

პედიატრიული მოსახლეობა

არ დაფიქსირდა კლინიკურად მნიშვნელოვანი გავლენა ზრდასა და სქესობრივ მომწიფებაზე 3-წლიან კვლევაში, რომელიც დაფუძნებულია საერთო მომწიფების და განვითარების შეფასებაზე, ტანერის სტადიის შეფასებაზე და სიმაღლისა და წონის გაზომვაზე.

ფილტვების ინტერსტიციული დაავადება

ფილტვების ინტერსტიციული დაავადების გამონაკლისი შემთხვევები დაფიქსირდა ზოგიერთი სტატინის გამოყენებისას, განსაკუთრებით ხანგრძლივი თერაპიის დროს.  დამახასიათებელი ნიშნები შეიძლება მოიცავდეს ქოშინს, არაპროდუქტიული ხველას და ზოგადი ჯანმრთელობის გაუარესებას (დაღლილობა, წონის დაკლება და ცხელება). თუ არსებობს ეჭვი, რომ პაციენტს განუვითარდა ფილტვების ინტერსტიციული დაავადება, სტატინებით თერაპია უნდა შეწყდეს.

შაქრიანი დიაბეტი

ზოგიერთი მტკიცებულება  ვარაუდობს, რომ სტატინები, როგორც კლასი, ზოგიერთ პაციენტებში იწვევს სისხლში გლუკოზის დონის მომატებას

მიასთენიაგრავისი

ზოგიერთ შემთხვევაში ცნობილი ხდება, რომ სტატინები იწვევევს ხელახალ ან აძლიერებს ადრე არსებულ მიასთენიას ან თვალის მიასთენიას. ატორვასტატინი  შეწყვეტილი უნდა იქნეს, სიმპტომების გაუარესების შემთხვევაში.

იგივე ან განსხვავებული სტატინის (ხელახალი) შეყვანისას დაფიქსირდა რეციდივები. ატორვასტატინი შეიცავს ლაქტოზას. პაციენტებმა იშვიათი მემკვიდრეობითი პრობლემებით გალაქტოზას აუტანლობა, ლაქტაზას სრული დეფიციტი ან გლუკოზა-გალაქტოზას მალაბსორბციით, არ უნდა მიიღონ ეს პრეპარატი.

გავლენა მანქანის მართვისადა დანადგარების გამოყენებისუნარზე

ატორვასტატინი უმნიშვნელო გავლენას ახდენს ავტომობილის მართვისა და დანადგარებთან მუშაობის უნარზე.

შეფუთვა

აპკიანი გარსით დაფარული 10 ტაბლეტი Alu-Alu ბლისტერში, 3 ბლისტერი მუყაოს კოლოფში ინსტრუქციასთან ერთად.

შენახვის პირობები

ინახება მშრალ და ბნელ ადგილას არა უმეტეს 25°C ტემპერატურაზე.

შეინახეთ მედიკამენტი ბავშვებისთვის მიუწვდომელ ადგილას.

შენახვის ვადა

3 წელი.

არ გამოიყენოთ პრეპარატი ვარგისობის ვადის გასვლის შემდეგ.

გაცემის წესი

ფარმაცევტული პროდუქტის ჯგუფი II, გაიცემა ფორმა №3  რეცეპტით.

მწარმოებელი

MAXTAR BIO-GENICS.

K.NO.705, ნალაგარ როუდი,

Malku Majra, ბადი, (H.P.)-173205, ინდოეთი.

ექსპორტირებულია:

არავის ფარმასიუტიკალსი

35, პირველი სართული, ბჰარატ ნაგარ როუდი,

შრინაგარის კოლონია, დელი-110052 (ინდოეთი).