ბეტაჰისტინი MCC 24მგ #60ტ

ბეტაჰისტინი MCC

შემადგენლობა

აქტიური ნივთიერება: ბეტაჰისტინის დიჰიდროქლორიდი.

ბეტაჰისტინი MCC 8 მგ

თითოეული ტაბლეტი შეიცავს 8 მგ ბეტაჰისტინის დიჰიდროქლორიდს.

ბეტაჰისტინი MCC 24 მგ

თითოეული ტაბლეტი შეიცავს 24 მგ ბეტაჰისტინის დიჰიდროქლორიდს.

სხვა ინგრედიენტები: მიკროკრისტალური ცელულოზა 101, პოვიდონი K30, სიმინდის სახამებელი, კოლოიდური უწყლო სილიციუმი, ტალკი.

გამოყენება

ბეტაჰისტინი MCC-ის აქტიური ნივთიერებაა ბეტაჰისტინი, რომელიც ჰისტამინის მსგავსია. ჰისტამინი ბუნებრივად გვხვდება ადამიანის ორგანიზმში. ბეტაჰისტინი გავლენას ახდენს თავის ტვინის წონასწორობის ცენტრის არასწორ ფუნქციონირებაზე, ასევე აუმჯობესებს სისხლის ნაკადს შიდა ყურში. ბეტაჰისტინი MCC ნაჩვენებია მენიერის სინდრომის სამკურნალოდ, რომლის სიმპტომები შეიძლება მოიცავდეს თავბრუსხვევას (ხშირად ასოცირდება გულისრევასთან და/ან ღებინებასთან), ტინიტუსსს (ხმაური ყურებში) და სმენის დაკარგვას.

უკუჩვენებები

ბეტაჰისტინი MCC უკუნაჩვენებია შემდეგ შემთხვევებში:

- ალერგია (ჰიპერმგრძნობელობა) ბეტაჰისტინის დიჰიდროქლორიდის ან ამ პრეპარატის რომელიმე კომპონენტის მიმართ (ჩამოთვლილია შემადგენლობაში);

- თირკმელზედა ჯირკვლის სიმსივნე (ფეოქრომოციტომა);

- ორსულობის ან ძუძუთი კვების დროს.

გაფრთხილებები და სიფრთხილის ზომები

ბეტაჰისტინი MCC-ის გამოყენებამდე საჭიროა ექიმთან ან ფარმაცევტთან კონსულტაცია შემდეგ შემთხვევებში:

-  კუჭის ან ნაწლავის წყლული;

- სასუნთქი გზების ქრონიკული დაავადება (ბრონქული ასთმა);

- ჭინჭრის ციება, გამონაყარი კანზე ან ალერგიული რინიტი - სიმპტომები შეიძლება გამწვავდეს ბეტაჰისტინი MCC-ის მიღების შემთხვევაში;

- ჰიპოტონია;

- თუ იმავდროულად  ხდება სხვა სამკურნალო საშუალებების მიღება, რომლებიც გამოიყენება ალერგიის ან გაციების სამკურნალოდ - ეგრეთ წოდებული ანტიჰისტამინური საშუალებები (იხ. პუნქტი „სხვა მედიკამენტები და ბეტაჰისტინი MCC“).

ბავშვები და მოზარდები

არასაკმარისი მონაცემებისა და გამოცდილების გამო, ბეტაჰისტინი MCC არ უნდა დაინიშნოს ბავშვებსა და 18 წლამდე ასაკის მოზარდებში.

სხვა მედიკამენტები და ბეტაჰისტინი MCC

აცნობეთ ექიმს ან ფარმაცევტს, თუ იღებთ, ცოტა ხნის წინ მიიღეთ ან შესაძლოა მიიღოთ სხვა მედიკამენტები.

თუ ბეტაჰისტინი MCC გამოიყენება ალერგიის ან გაციების სამკურნალო გარკვეულ მედიკამენტებთან ერთად (ანტიჰისტამინური საშუალებები), ორივე პრეპარატის ეფექტი შეიძლება შემცირდეს. ანტიჰისტამინური საშუალების გამოყენებისას, ამ პრეპარატის დოზა უნდა შემცირდეს თანდათანობით, დაახლოებით 6 დღის განმავლობაში ბეტაჰისტინი MCC-ის მიღების დაწყებამდე.

ორსულობა, ძუძუთი კვება და ნაყოფიერება

თუ ხართ ორსულად ან ძუძუთი კვებავთ, ფიქრობთ, რომ შეიძლება იყოთ ორსულად ან გეგმავთ ბავშვის გაჩენას, ამ პრეპარატის მიღებამდე რჩევისთვის მიმართეთ ექიმს ან ფარმაცევტს.

ბეტაჰისტინი MCC არ უნდა მიიღოთ, თუ ხართ ორსულად ან ძუძუთი კვებავთ, რადგან არ არსებობს ადეკვატური მონაცემები ცხოველებში და ადამიანებში ორსულობისა და ძუძუთი კვების დროს გამოყენების შესახებ.

ავტომობილის და მექანიზმების მართვა

სატრანსპორტო საშუალებების მართვის ან მექანიზმებთან მუშაობის უნარზე ზემოქმედების შესახებ შემთხვევა არ არის ცნობილი.

გამოყენების წესი

პრეპარატი ყოველთვის გამოიყენეთ ზუსტად ექიმის ან ფარმაცევტის რჩვეის მიხედვით. თუ რაიმეში დარწმუნებული არ ხართ, მიმართეთ ექიმს ან ფარმაცევტს.

გამოყენების ჩვეულებრივი დოზა არის:

  ბეტაჰისტინი MCC 8 მგ

8 მგბეტაჰისტინი MCC-ის 1-2 ტაბლეტი, 3-ჯერ დღეში (შეესაბამება 24-48 მგ ბეტაჰისტინის დიჰიდროქლორიდს).

ბეტაჰისტინი MCC 24 მგ

24 მგბეტაჰისტინი MCC-ის 1 ტაბლეტი, 2-ჯერ დღეში (შეესაბამება 24-48 მგ ბეტაჰისტინის დიჰიდროქლორიდს).

ტაბლეტები მიიღება დაღეჭვის გარეშე, საკმარისი რაოდენობით სითხესთან ერთად, ჭამის დროს ან შემდეგ.

ბეტაჰისტინი MCC-ის მიღების ხანგრძლივობა განისაზღვრება ექიმის დანიშნულებით. ­­­­მკურნალობის ეფექტი ზოგჯერ შეინიშნება მხოლოდ რამდენიმე კვირის შემდეგ, ხოლო მაქსიმალური ეფექტი ზოგჯერ მიიღწევა რამდენიმე თვის შემდეგ. როგორც წესი, მკურნალობა გრძელვადიანია, გრძელდება რამდენიმე თვე.

ჭარბი დოზირება

ბეტაჰისტინი MCC-ის დოზის გადაჭარბებისას, შეიძლება განვითარდეს შემდეგი სიმპტომები: 

- თავის ტკივილი, სახის სიწითლე, არტერიული წნევის გამოხატული დაქვეითება, გულისცემის აჩქარება, სუნთქვის გაძნელება ბრონქების შეკუმშვის გამო (ბრონქული ასთმა) და ზედა სასუნთქი გზების ლორწოვანი გარსის შეშუპება წყლის შეკავების გამო (კვინკეს შეშუპება).

ბეტაჰისტინი MCC-ის ზედოზირებულად მიღებისას, დაუყოვნებლივ მიმართეთ ექიმს ან უახლოეს საავადმყოფოს სასწრაფო დახმარების განყოფილებას. არ დაგავიწყდეთ ამ პრეპარატის დარჩენილი ტაბლეტების ან პრეპარატის შეფუთვის თან წაღება.

დოზის გამოტოვება

თუ დაგავიწყდათ ბეტაჰისტინი MCC-ის ტაბლეტის მიღება,  შემდეგი ტაბლეტი მიიღეთ ჩვეულ დროს. არ მიიღოთ ორმაგი დოზა გამოტოვებული დოზის კომპენსირების მიზნით.

ბეტაჰისტინი MCC-ის მიღების შეწყვეტა

ბეტაჰისტინი MCC-ის მიღება არ შეწყვიტოთ  ექიმთან შეთანხმების გარეშე.

ექიმმა შეიძლება გადაწყვიტოს მკურნალობის გაგრძელება სიმპტომრბის გაუმჯობესების შემთხვევაშიც კი, რათა უზრუნველყოს პრეპარატის მაქსიმალური ეფექტის მიღწევა.

მედიკამენტის გამოყენებასთან დაკავშირებით დამატებითი შეკითხვების შემთხვევაში, მიმართეთ ექიმს ან ფარმაცევტს.

შესაძლო გვერდითი ეფექტები

ყველა პრეპარატის მსგავსად, ამ პრეპარატსაც შეუძლია გამოიწვიოს გვერდითი ეფექტბი, თუმცა ისინი ყველას არ უვითარდება.

გვერდითი ეფექტები ქვემოთ მოცემულია განვითარების სიხშირის მიხედვით. შემთხვევების განვითარების სიხშირე განისაზღვრება შემდეგნაირად:

იშვიათი (შეიძლება აღინიშნოს 1000-დან 1 ადამიანში):

- მაღალი წნევის შეგრძნება თავის არეში;

- სწრაფი გულისცემის შეგრძნება, წნევის შეგრძნება გულმკერდში;

- შეიძლება გამწვავდეს არსებული ბრონქული ასთმა;

- ბოყინი, გულმკერდის არეში წვის შეგრძნება, უსიამოვნო შეგრძნებები და კუჭის ტკივილი, შებერილობა;

- სიცხის შეგრძნება.

ძალიან იშვიათი (შეიძლება აღინიშნოს 10000-დან 1-მდე ადამიანში):

- გარდამავალი გამონაყარი კანზე და ქავილი.

უცნობია (სიხშირის შეფასება შეუძლებელია არსებული მონაცემებით):

- თავის ტკივილი და ზოგჯერ ძილიანობა.

თუ შეამჩნევთ რომელიმე ზემოთ ჩამოთვლილ გვერდით ეფექტს, მიმართეთ ექიმს შესაბამისი ზომების მისაღებად.

კუჭის ტკივილის თავიდან აცილება შესაძლებელია ბეტაჰისტინი MCC-ის მიღებით ჭამის დროს ან ჭამის შემდეგ, ან დოზის შემცირებით

გვერდითი ეფექტების შეტყობინება

რაიმე გვერდითი ეფექტის განვითარების შემთხვევაში, მიმართეთ ექიმს ან ფარმაცევტს. მათ შორის, ნებისმიერი ისეთი გვერდით ეფექტის შესახებ, რომელიც შესაძლოა არ არის ჩამოთვლილი ზემოთ. არასასურველი რეაქციების შესახებ, ასევე შეგიძლიათ შეატყობინოთ პირდაპირ ეროვნული შეტყობინების სისტემით, რომლის მონაცემები გამოქვეყნებულია მედიკამენტების და სამედიცინო მოწყობილობების ეროვნული სააგენტოს ვებგვერდზე http://www.anm.ro/. გვერდითი ეფექტების შეტყობინებით, შეგიძლიათ დაეხმაროთ ამ მედიკამენტის უსაფრთხოების შესახებ მეტი ინფორმაციის მოწოდებას.

ბეტაჰისტინი MCC შენახვის წესი

პრეპარატი შეინახეთ ბავშვებისთვის მიუწვდომელ ადგილას.

ინახება 25°C-ზე დაბალ ტემპერატურაზე, ორიგინალ შეფუთვაში.

არ გამოიყენოთ ეს პრეპარატი ვარგისობის ვადის გასვლის შემდეგ, რომელიც მითითებულია კოლოფზე EXP-ის შემდეგ. ვარგისობის ვადა ეხება ამ თვის ბოლო დღეს.

არ გადაყაროთ პრეპარატები კანალიზაციაში ან საყოფაცხოვრებო ნაგავში. ჰკითხეთ ფარმაცევტს, როგორ გადაყაროთ პრეპარატები, რომლებსაც აღარ იყენებთ. ეს ზომები ხელს შეუწყობს გარემოს დაცვას.

ბეტაჰისტინი MCC-ის გარეგნული აღწერა და შეფუთვის შიგთავსი

ბეტაჰისტინი MCC 8 მგ

მრგვალი, ორმხრივ ამობურცული ტაბლეტები, თეთრი ან თითქმის თეთრი ფერის, ცალ მხარეს ხაზით, 7 მმ დიამეტრით. ხაზი ტაბლეტზე განკუთვნილია მხოლოდ გატეხვის გასამარტივებლად, თუ გიძნელდებათ მისი მთლიანად გადაყლაპვა.

შეფუთულია მუყაოს კოლოფში გამჭვირვალე პვქ-პვდქ/ალ 3 ბლისტერით, თითოეული ბლისტერი შეიცავს 10 ტაბლეტს, ან მუყაოს კოლოფში გამჭვირვალე პვქ-პვდქ/ალ 10 ბლისტერით, თითოეული ბლისტერი შეიცავს 10 ტაბლეტს.

ბეტაჰისტინი MCC 24 მგ

მრგვალი, ორმხრივ ამობურცული ტაბლეტები, თეთრი ან თითქმის თეთრი ფერის, ერთ მხარეს ჯვრის ფორმის 2 ხაზით, 11 მმ დიამეტრით. ხაზი ტაბლეტზე განკუთვნილია მხოლოდ გატეხვის გასამარტივებლად, თუ გიძნელდებათ მისი მთლიანად გადაყლაპვა.

შეფუთულია მუყაოს კოლოფში გამჭვირვალე პვქ-პვდქ/ალ 2 ბლისტერით, თითოეული ბლისტერი შეიცავს 10 ტაბლეტს, ან მუყაოს კოლოფში გამჭვირვალე პვქ-პვდქ/ალ 5ბლისტერით, თითოეული ბლისტერი შეიცავს 10 ტაბლეტს, ან  მუყაოს კოლოფში გამჭვირვალე პვქ-პვდქ/ალ 6 ბლისტერით, თითოეული ბლისტერი შეიცავს 10 ტაბლეტს,

სავაჭრო ნებართვის მფლობელი და მწარმოებელი

MAGISTRA C&C S.R.L.,

Bd. Aurel Vlaicu nr. 82A, 900055, კონსტანცა, რუმინეთი

ტელ.: +40241/634742

ფაქსი: +40241/634742

ელ.ფოსტა: [email protected]